බුදුරදුන් සහ ජේසුස් ක්‍රිස්තුස් දුටු ස්ත්‍රීවාදය.

                                            තාක්ෂණයෙන් වගේම බුද්ධිමය අතින්ද දැවැන්ත පියවර තබන මානවයා ඇතැම් සමාජමය කරණා වලදී පසුගාමී චින්තනයක් පදනම් කරගනී. සමාජය තුළ කාන්තාව වෙත හෙලන දෘෂ්ටිය ඉන් ප්‍රධාන කාරණයක්. පුරාණ ‍ වෙදික යුගයේදී කාන්තවට ද, පුර්ෂයාට සමාජයේ හිමිව තිබූ සෑම අයිතිවාසිකමක්ම හිමි වුණා. ජගන්මාතා වන්දනය තුළින් කාන්තාව  පුජනීයත්වයෙන් ද සළකනු ලැබුවා. නමුත් බ්‍රහ්මණ යුගය වීමේදී කාන්තාවට තිබූ සෑම අයිතිවාසිකමක්ම බ්‍රහ්මණ සමාජය උදුරා ගනු ලැබුවා.

                                                                සමාජ ක්‍රමය විනිවිද දකිමින්, අදුරදර්ශී සමාජය හෙලා දකිමින්, උඩුගම් බලා පිහිනනා පරමාදර්ශී පුද්ගලයන් ආගමික ශාස්තෘවරුන් විදිහට හදුන්වන්න මම කැමතියි. ලෝකයට බිහිවුණු බුදුන්වහන්සේත්, ක්‍රිස්තුස් වහසේත් එවන් පරමාදර්ශී පුද්ගලයන් වුනු ආගමික ශාස්තෘවරුන් දෙදෙනෙක්. ඔවුන් සමාජය තුළ කාන්තාවට අහිමිවූ අයිතිවාසිකමක් ලබා දෙන්න දැවැන්ත අරගල අරගෙන ගියේ නෑ. ඒත් තමන්ට මෙකී සමාජයට නව දැක්මක් ලබා දෙන්න උපකාරී වුණු මාතෘත්වයට ගරු කරමින් තාමාගේ දැක්ම ඇතුළේ කාන්තා නිදහස වෙනුවෙන් අනුබලක් ලබා දුන්නා.

                                                          බුද්ධ දේශනාව තුළ කාන්තාවට විශාල ඉඩක් ලැබුණා. පියා පමණක් නොව මවද පුර්වාචාරීන් ලෙස හදුන්වා දුන්නා. කෝසල මල්ලිකාට දියණියක් ලැබීමෙන් දුක් වුනු කොසොල් රජුට, ඇතැම් ස්ත්‍රීන් පුර්ෂන්ට වඩා ශ්‍රේෂ්ඨ වන බව බුදුන්වහන්සේ පහදා දුන්නා. සිගාල සුත්‍රයේ සදහන් පරිදි කාන්තාව අයිතිවාසිකම් සහිත ගරුත්වය යුතු කෙනෙක් බවට සදහන් කරනවා. බුදු සසුනේ සිව්වනක් පිරිසෙන් අඩක් කාන්තා නියෝජනය කිරීම හමුවේ ස්ත්‍රීන්ට හිමි වූ නිසිතැන හදුනා ගන්න පුළුවන්. කාන්තාවකට බුද්ධි මහිමය සංවර්ධනය කිරීමෙන් විශ්මයජනක දේ කළ හැකි බව භික්ෂුණි සංයුක්තයේ එන සෝමා තෙරණියගේ කතාවෙන් ද පැහැදිලි වේ. භික්ෂුණි සංයුක්තයේ වජිරා, ගෝතමී, විජයා,උත්පලවන්නා, උපචාලා, සුපචාලා,සේලා යන කතා පුවත් තුලින් ද ස්ත්‍රීත්ව ලැබීම ශාපයක් නොවන බව පෙන්වා දෙයි.

                                              ක්‍රිස්තුස් වහන්සේ ජිවත් වූ ජුදා සමාජය ද කාන්තාව සතු අයිතිවාසිකම් සහ ගරුත්වය අහිමිකල සමාජයකි. නමුත් ක්‍රිස්තු ආගමනයෙන් පසු එය වෙනස් කරන්නට එතුමා වෙරදරුවා. අධ්‍යාපන අයිතිය කාන්තාවන්ට අකැප සමාජයක දැනුම් පිපාසයෙන් සිටි මරියාට ක්‍රිස්තුස් වහන්සේ දහම උගන්වා තිබෙනවා. ක්‍රිස්තුස් වහන්සේගේ උත්ථානය පිදිබද පළමු ආරංචිය ලැබුනේද කාන්තාවන් තිදෙනෙකුටයි. රබ්බවරුන් කාන්තාවගෙන් ඇප උපස්ථානය ලැබීම ප්‍රතික්ෂේප කලද තම හිතාදර ගෝලයා වූ පේදුරුගේ මව ක්‍රිස්තුස් වහන්සේට ඇප උපස්ථාන කළ බව මාක්, ලුක් සහ මතෙව් යන සුවිශේෂ ත්‍රිත්වයම පවසනවා. සමාජයේ අසුබවාදී චරිතයක් ලෙස හංවඩු ගැසුණු වැන්දඹුවන් පිල්කුල් කළ යුතු නොව දයානුකම්පාව දැක්විය යුතු පිරිසක් බව ක්‍රිස්තුස් වහන්සේ දැඩිව පෙන්වා දුන්නා. කාන්තාවන්ට හිමි නිසි පිළිගැනීම නොලැබුණු සමාජයක මග්දලාහි මරියා, පේදුරුගේ නැන්දණිය, යාසරස්ගේ දියණිය, බෙතානියේ ස්ත්‍රිය, ලේ මාල රෝගයෙන් පෙළුණු කාන්තාව ආදී බොහොමයක් ස්ත්‍රිගේ ශාරීරික, මානසික, මෙන්ම අධ්‍යාත්මික රෝග සුව කිරිමට ක්‍රිස්තුස් වහන්සේ නොපැකිලව ඉදිරිපත් වුවා.

                                            ඒ අනුව බුදුන්වහන්සේගේ දර්ශනයත්, ක්‍රිස්තුස් වහසේගේ ධර්මයත් කාන්තා නිදහස වෙනුවෙන් අනුබලක් ලබා දෙමින් කාන්තාවන් සමාජයේ හිමි නිසිතැන ලබා දිමට කටයුතු කළා. බුද්ධ දර්ශනය අනුගමය කරන්නෝත්, ක්‍රිස්තු ධර්මය අදහන්නෝත් කාන්තාවනට සමාජය තුළ සමතැන ලබා දීම කවරක් වෙතත් නිසිතැන ලබා දිමට උත්සුක විය යුතුමය.